Oxford vaccine trials begin in India -
DCGI approves Serum Institute
ఆక్స్ఫర్డ్ టీకా ప్రయోగాలు భారత్‌లోనూ
షురూ
- సీరమ్ ఇన్‌స్టిట్యూట్‌కు డీసీజీఐ అనుమతి
వ్యాక్సిన్ ట్రయల్స్ ను పలు
దేశాల్లో నిలిపివేసినట్టు ఆక్స్ఫర్డ్ ప్రకటించగా.. ఆ ప్రభావం భారత్‌లో ఉండదని, ట్రయల్స్
కొనసాగుతున్నాయని సీరమ్ సంస్థ ప్రకటించగా డీసీజీఐ షోకాజ్ నోటీసులు జారీ చేసింది.
వ్యాక్సిన్ తీసుకున్న ఓ వ్యక్తికి
అనారోగ్యానికి గురికావడంతో తాత్కాలికంగా నిలిచిపోయిన ఆక్స్ఫర్డ్- ఆస్ట్రాజెన్‌కా
క్లినికల్ ట్రయల్స్ బ్రిటన్‌లో పునఃప్రారంభమైన విషయం తెలిసిందే. తాజాగా, భారత్‌లోనూ
ఆక్స్ఫర్డ్ వ్యాక్సిన్ క్లినికల్ ట్రయల్స్‌ను కొనసాగించడానికి డ్రగ్స్‌
కంట్రోలర్‌ జనరల్‌ ఆఫ్‌ ఇండియా(డీసీజీఐ) అనుమతించింది. రెండు, మూడో దశ ప్రయోగాల కోసం రిక్రూట్‌మెంట్‌ను నిలిపివేయాలన్న ఆదేశాలనూ వెనక్కు
తీసుకున్నట్టు ప్రకటించింది. అయితే, అత్యంత జాగ్రత్తగా
వీటిని కొనసాగించాలని డీసీజీఐ డాక్టర్ వీజీ సోమానీ సూచించారు.
బ్రిటన్‌కు చెందిన డేటా అండ్‌
సేఫ్టీ మానిటరింగ్‌ బోర్డ్‌తో పాటు భారత్ డీఎస్‌ఎంబీ కూడా వ్యాక్సిన్ ట్రయల్స్
పునఃప్రారంభానికి సిఫార్సు చేయడంతో డీసీజీఐ ఈ నిర్ణయం తీసుకుంది. ఆక్స్ఫర్డ్
టీకా సురక్షితమేనని మెడిసిన్స్‌హెల్త్‌ రెగ్యులేటరీ అథారిటీ(ఎంహెచ్‌ఆర్‌ఏ)
నిర్ధారించడంతో బ్రిటన్‌లో ప్రయోగాలు ప్రారంభమయ్యాయి. ఈ సిఫార్సుల ఆధారంగా సీరం
ఇన్‌స్టిట్యూట్‌ సైతం డీసీజీఐకి వాలంటీర్లకు సంబంధించిన సమాచారం, ప్రయోగాల్లో
అనుసరిస్తున్న విధానాలు, తీసుకుంటున్న జాగ్రత్తల్ని తదితర
వివరాలను పునఃసమీక్షించి పంపించింది.
అదనపు భద్రతా పర్యవేక్షణకు
సంబంధించిన వివరాలను అందజేసింది. అనుకోని దుష్ప్రభావాలు తలెత్తితే అనుసరించనున్న
నియమాలనూ వివరించింది. వ్యాక్సిన్ ఇచ్చిన తర్వాత వారం రోజుల పాటు వాలంటీర్‌పై
ఎలాంటి పరిశీలన కొనసాగుతుందో తెలియజేసింది. బ్రిటన్‌, భారత్
డీఎస్‌ఎంబీ సిఫార్సులతో పాటు.. సీరం ఇన్‌స్టిట్యూట్‌ సమర్పించిన వివరాల్ని
పరిగణనలోకి తీసుకొని క్లినికల్ ప్రయోగాలు పునఃప్రారంభానికి అనుమతించినట్లు
డీసీజీఐ సొమానీ తెలిపారు.
సీరమ్ ఇన్‌స్టిట్యూట్‌లో
ఇప్పటివరకూ జరిగిన టీకా ట్రయల్స్, వాటి ఫలితాల వివరాలు, వాలంటీర్లకు వచ్చిన దుష్ప్రభావం గురించిన సమగ్ర సమాచారాన్ని అందజేయాలని
డీసీజీఐ ఇటీవల ఆదేశించింది. రోగుల భద్రతపై స్థిరమైన అభిప్రాయానికి రాకుండా దేశంలో
టీకా రెండు, మూడో దశ క్లినికల్ ట్రయల్స్ ఎందుకు
నిలిపివేయలేదని ప్రశ్నించింది.
0 Komentar