Good news for FD investors as RBI keeps
repo rate unchanged
డబ్బులు డిపాజిట్ చేసే
వారికి ఆర్‌బీఐ శుభవార్త – వరుసగా మూడోసారి, వడ్డీరేట్లు మారలేదు
దేశ కేంద్ర బ్యాంక్ రిజర్వు బ్యాంక్ ఆఫ్ ఇండియా కీలక నిర్ణయం తీసుకుంది. కీలక రెపో రేటును స్థిరంగా కొనసాగిస్తున్నట్లు ప్రకటించింది. దీంతో బ్యాంకుల్లో డబ్బులు ఫిక్స్‌డ్ డిపాజిట్ చేసుకునే వారికి ఊరట కలుగనుంది.
ఆర్‌బీఐ మానిటరీ పాలసీ
రెపో రేటు అక్కడే
నిలకడగానే రివర్స్ రెపో
రిజర్వు బ్యాంక్ ఆఫ్ ఇండియా RBI కీలక నిర్ణయం తీసుకుంది. ఆర్‌బీఐ పాలసీ సమీక్షలో కీలకమైన వడ్డీ రేట్లను స్థిరంగానే కొనసాగిస్తున్నట్లు ప్రకటించింది. దీంతో ఆర్‌బీఐ రెపో రేటు 4 శాతం వద్దనే నిలకడగానే కొనసాగుతోంది. రివర్స్ రెపో రేటు కూడా 3.35 శాతం వద్దనే స్థిరంగా ఉంది.
ఆర్‌బీఐ కీలక వడ్డీ రేట్లను స్థిరంగా కొనసాగించడం ఇది వరుసగా మూడోసారి కావడం గమనార్హం. రిజర్వు బ్యాంక్ నేటి ద్రవ్య పరపతి విధాన సమీక్షలో 2020-21 ఆర్థిక సంవత్సరానికి సంబంధించి రియల్ జీడీపీ వృద్ధి -7.5 శాతంగా ఉండొచ్చని అంచనా వేసింది. క్యూ3 జీడీపీ 0.1 శాతంగా, క్యూ4 జీడీపీ వృద్ధి 0.7 శాతంగా ఉండొచ్చని తెలిపింది.
ఇకపోతే ఆర్‌బీఐ రేట్లను యథాతథంగా కొనసాగించడం వల్ల కొంత మందికి బెనిఫిట్ కలుగనుంది. బ్యాంకుల్లో డబ్బులు దాచుకునే వారికి ఊరట కలుగుతుంది. ఆర్‌బీఐ వడ్డీ రేట్లను తగ్గిస్తే.. బ్యాంకులు కూడా ఇదే దారిలో నడుస్తాయి. దీంతో సేవింగ్స్, ఎఫ్‌డీ రేట్లు తగ్గుతాయి. కానీ ఇప్పుడు ఆర్‌బీఐ వడ్డీ రేట్లను తగ్గించకపోవడంతో బ్యాంకులు కూడా ప్రస్తుత వడ్డీ రేట్లను కొనసాగించొచ్చు.
అయితే రుణ గ్రహీతలకు మాత్రం ప్రయోజనం ఉండదు. రిజర్వు బ్యాంక్ కీలక రెపో రేటును తగ్గిస్తే.. అప్పుడు బ్యాంకులు కూడా రుణ రేట్లను సమీక్షించుకోవలసి ఉంటుంది. అంటే రుణ రేట్లను తగ్గించే అవకాశముంటుంది. కానీ ఇప్పుడు రిజర్వు బ్యాంక్ రేట్లను నిలకడగా కొనసాగించడంతో రానున్న రోజుల్లో రుణ రేట్లు కూడా తగ్గే అవకాశం ఉండకపోవచ్చు.
0 Komentar