Ramesh Pokhriyal Approves Performance Grading Index 2019-20 for States, UTs

Ramesh Pokhriyal Approves Performance Grading Index 2019-20 for States, UTs

పాఠశాల విద్యపై రాష్ట్రాలకు కేంద్రం గ్రేడింగ్ - నివేదిక విడుదల చేసిన కేంద్ర విద్యాశాఖ 

పాఠశాల విద్యలో మార్పులు చేర్పులు చేసిన రాష్ట్రాలకు కేంద్ర ప్రభుత్వం గ్రేడింగ్ విధానాన్ని జారీ చేసింది. దీనికి సంబంధించిన పెర్‌ఫార్మెన్స్ గ్రేడింగ్ ఇండెక్స్ (PGI)ను కేంద్ర విద్యాశాఖ మంత్రి రమేష్ పోఖ్రియాల్ నిశ్శాంక్..ఈ మధ్యాహ్నం దేశ రాజధానిలో ఆవిష్కరించారు. అన్ని రాష్ట్రాలు/కేంద్ర పాలిత ప్రాంతాలను ఇందులో చేర్చారు. ఆయా రాష్ట్రాలు, కేంద్ర పాలిత ప్రాంతాలు పాఠశాల విద్యలో చేసిన మార్పులు, ప్రక్షాళనకు అనుగుణంగా గ్రేడింగ్ విధానాన్ని ఇచ్చారు.

వెయ్యి మార్కులకు సంబంధించిన స్కోరింగ్ ఇది. పాఠశాల విద్యకు సంబంధించి కేంద్రం.. కొత్తగా గ్రేడింగ్ విధానాన్ని విడుదల చేసింది. ఈ పెర్ఫార్మెన్స్ గ్రేడింగ్ ఇండెక్స్, 1000 మార్కులకు 950 పైగా స్కోర్ వచ్చిన రాష్ట్రాలు/కేంద్రపాలిత ప్రాంతాలను లెవెల్-1లో చేర్చింది. ఇందులో ఎవరికీ చోటు దక్కలేదు. లెవల్-2(900-950 స్కోర్), లెవల్-3(851-900 స్కోర్), లెవల్-4(801-850 స్కోర్), లెవల్-5(751-800 స్కోర్) కింద గ్రేడింగ్ ఇవ్వగా, లెవెల్ - 4లో AP, లెవెల్ -5లో TS నిలిచాయి.

ఇందులో లెవెల్ 1లో ఏ ఒక్క రాష్ట్రం గానీ, కేంద్ర పాలిత ప్రాంతం గానీ చోటు దక్కించుకోలేదు. లెవెల్ 2లో అత్యధిక గ్రేడింగ్ సాధించిన రాష్ట్రాలకు 1++ గ్రేడింగ్ ఇచ్చారు. ఈ కేటగిరీలో పంజాబ్, చండీగఢ్, తమిళనాడు, అండమాన్ అండ్ నికోబార్, కేరళ నిలిచాయి. లెవెల్ 3 విభాగంలో గ్రేడ్ 1+ సాధించిన రాష్ట్రాలు/కేంద్ర పాలిత ప్రాంతాల్లో దాద్రానగర్ హవేలి, గుజరాత్, హర్యానా, మహారాష్ట్ర, ఢిల్లీ ఎన్సీటీ, పుదుచ్చేరి, రాజస్థాన్ ఉన్నాయి. 

లెవెల్ 4 కింద మంజూరు చేసిన గ్రేడ్ 1లో ఏపీ, పశ్చిమ బెంగాల్, దమన్ అండ్ డయ్యు, హిమాచల్ ప్రదేశ్, కర్ణాటక, ఒడిశా, త్రిపుర, ఉత్తర ప్రదేశ్ నిలిచాయి. లెవెల్ 5 కింద గ్రేడ్ 2గా గుర్తించిన రాష్ట్రాల్లో గోవా, ఉత్తరాఖండ్, జమ్మూ కాశ్మీర్, జార్ఖండ్, లక్షద్వీప్, మణిపూర్, సిక్కిం, తెలంగాణ ఉన్నాయి. అస్సాం, బిహార్, మధ్యప్రదేశ్, మిజోరం, అరుణాచల్ ప్రదేశ్, ఛత్తీస్‌గఢ్, నాగాలాండ్, మేఘాలయా, లఢక్.. లెవెల్ 6 నుంచి లెవెల్ 10 మధ్య నిలిచాయి.